Sunday 8 April 2007

the timeline of sham el niseem




شم النسيم عبر التاريخ
شم النسيم دا حكايته حكاية..أكتر عيد تم اقتباسه و تعديله و تغيير مواعيده و رابط بين كذا ثقافة بشكل ما مبهم و غير مباشر..
انا كنت بفكر في أصل اليوم ده و نتائجه لقيت في تفاصيل صعبة جدا ..
الموضوع بدايته من زمان جدا ..(انا معتمد تماما على معلومات عبر قرائات و سمع و حوارات من الطفولة و حتى الأن.. فا لو غلطت ياريت تصلحلولي المعلومة ! )


- العيد هو عيد الربيع المصري من ايام الفراعنة(أكتر من 5000 سنة;) و كان من الأعياد المهمة لأنه كان حسب أعتقادهم يوم بدأ الخلق و ميلاد العالم.

- كانوا بيحتفلوا بأكل الأسماك المملحة و البيض واللذي منه زي دلوقتي كدا..بس مع رموز و دلالات دينية و نقش الأماني على البيض رمز بداية الحياة.

- زي ما احنا عارفين بني اسرائيل يوم ما خرجوا من مصر كان يوم مصر عندها عيد و بني أسرائيل هربوا في اليوم ده و ربنا نجاهم من فرعون و جنوده ففرحوا و خلوه يوم عيد برضه. فا بقى عيد الربيع المصري نفس يوم عيد " أو الفصح بكسر الصاد ..أو عيد العبور بتاعهم يعني..

- مرت سنين و كان احتفالهم صوم و عبادة و بيض و خس و بصل الى اخره..و أختلاف التقويم ملخبطني بس كان كل سنة يجي في وقت مختلف شأن التقويمات المختلفة و دخلت عليه طقوس من ثقافات تانية.

- حسب الأعتقاد المسيحي ان أحداث الصلب و القيامة كانت في الأيام المفترجة دي.. و المسيحيين الأوائل ما حبوش يحتفلوا بيه عشان بيرتبط بأحداث مفجعة.. لغاية ما تم الأتفاق على انها ذكرى يجب الأحتفال بيها مع صبغ البيض لون أحمر رمزا لدم المسيح و يكون دايما يوم الأحد..لأسباب كتيرة منها مخالفة اليهود حسب أراء و أراء شايفة انه "لأ طبعا الموضوع غير كدا"

-و لما دخلت المسيحية مصر كان المصريين طبعا "الله ؟..دا عيد الربيع بتاعنا"..فا السوفت وير كان متسطب بس اتعمله تحديث..بما انه يوم صوم و لازم يبقى فيه رنجة و بصل و الذي منه..خلوا الأحتفال بالربيع تاني يوم عيد القيامة أو الفصح (يوم الأثنين;) ...و المصريين مش هايغلبو.

-في الأسلام بعد كدا كان أحتفال المسلمين بصيام عاشوراء الذي قيل انه يوم نجى الله بني اسرائيل من فرعون و جنوده.. و كان العاشر من شهر المحرم ..مش عارف هل تصادف أن يهود بني قينقاع و اليهود تبعهم في يثرب كانوا صايمين يومها و لا دا تم بعد وحي الهي..المهم في ناس بتقول ان العيد ده هو الفصح و ناس بتقول أن دا يوم كيبور بتاع حرب اكتوبر.و الله اعلم.. بس برضو الصوم مستحب مع يوم تاني فبله او بعده مخالفة لليهود.

-بعد كدا حصلت معركة كربلاء في نفس اليوم دا بعد 60 سنة .. في عاشوراء..و قتل الحسين بن علي حفيد الرسول صلى الله عليه و سلم...وكانت مأساه و فاجعة و أنقسمت الأمة بسببها.

- يري الأخوة الشيعة ان صيام عشوراء بدعة و ضلالة و لا يجب الأحتفال و الأحتفاء به .. و عملو نسخة عنيفة جدا لذكرى مقتل الحسين رضي الله عنه!

-دلوقتي في مصر شم النسيم هو ببساطة عيد بييجي فيه الربيع و بناكل فيه رنجه و فسيخ (مش بحبه;) و بصل.و انتهاء صيام للمسيحيين و تلوين بيض ..و شكولاتة و ارانب وهدايا في الغرب و في عاشورا بناكل بليلة. و محدش فكر ان لولا ان اليوم دا كان عيد كانت الدنيا شكلها بقى ايه!؟

لو حد عاوز يصلح او يضيف حاجة عن اصل يوم عاشوراء يبقى يا ريت!
طبعا لو حد مسيحي أو يهودي يقدر يصلحلي معلوماتي أكون شاكر جدا .. و لو في قدماء مصريين يبقى هايل!

ودمتم..


4 comments:

  1. Hi.
    First time i visit your blog.
    You have great stuff here. My compliments!!!!

    Laura:)

    ReplyDelete
  2. على فكرة أنا ما كنتشمتوقع انى هاكمل الموضوع للأخر بس الطريقة الجميلة اللى انت بتحكى بيها شدتنى جدا ..
    المورشداية هايلة
    هههههههه(لو فى قدماء مصريين يبقى هايل ) ههههههههههههه

    ReplyDelete
  3. laura
    thank you so much for the nice comment..
    glad you like my stuff :D

    qindeel

    مافيش غير جداداء المصريين و مش عارفين حاجة هاهاها
    شكرا يا قنديل بيه!(بك)!

    ReplyDelete
  4. تدوينة حلوة
    ميرسي ع المعلومات
    :)

    ReplyDelete

counter